前路茫茫

黎到轉工旺季，加埋今年個市係好過舊年，所以，其他部門都有玩換人遊戲。個個星期都有人走，個個星期都有新人黎，搞到我都想走.....

一路以黎，做呢份工既目標係還自己心願，而家目標已經達到。自己其實係好似之前咁，做返同客接觸、以及同marketing有關既工作；而呢一年既時間，亦令我確定要向返呢方面發展既路向。另外，人大左，要承擔既野亦多左，但係到而家連交稅都仲未有資格交就真係有點兒那個.. 所以今次想轉工，或多或少都同呢兩個原因有關。

而家我面對既難題，究竟我應該辭先搵定搵左先辭.... 由於之前試過待業個多月，沒收入的姿味仍記憶尤新，所以而家遞信走都有少少擔心。但係唔辭黎搵的話，到你要見工時又唔係咁方便請假，而且深知以自己既身世冇人肯俾你一個月後先至返新工。拖得太耐時新一批新力軍又會同你飯食......

有朋友話一齊夾手夾腳打天下，齊齊做老闆，搞到自己都有d心動。但以自己而家既財力，又唔能夠支撐到間公司收支平衡既日子.......

所以，好煩！

523傷心事件...

2006-07年度既歐聯終於告一段落，冠軍得主係AC米蘭。

今晨出左去球迷會睇波活動，平時自己係屋企同屋企人睇波就試得多，係決賽出去同人地一齊睇反而未試過，百幾人一齊為愛隊打氣，一齊鬧某球員等等....所以今次都係一個幾好既經驗。

係，到而家我仲覺得利記係呢場比賽係踢得比差唔多全場打802陣式既AC好。失第一球只可以話係佢地好運，個自由球明明射到離行離列都可以省中恩波基改變方向入網。至於第二球，明明恩沙基越左位都唔吹，睇住個個利記球員舉手停哂係度球証都冇表示。試問佢又點會同你客氣呀...

輸左係技術手上我冇話可說，但AC球員既球品....歷史自有評論價，而球証最離譜既地方，明明補三分鐘，仲要係補時入面AC班球員詐死、換人等等時間全都冇補番，二分半鐘就吹雞完場。試問係一個咁重要比賽入面，呀球証你咁做合唔合理？

當然，今年輸左就係輸左，亦冇得講話如果乜乜如果物物利記實贏云云。今次當係上左傷心既一課，出年有機會的話，堂堂正正再將AC踢出局吧！

YNWA!!!!!

花卉展

自從讀大專時開始，每年3月係維園舉行既花卉展變成我同女友一年一度既例行活動。其實，每年既佈置都差唔多係一式一樣，例如香港龍頭花畫、鬱金香花橋等等已經係第二年出現。不過，都係一樣咁靚。

幾年黎，我都會有同一個感想：呢個唔係花展，而係一年一度相機展，當中你會睇到由最初個個都係菲林單鏡又或是而家睇返係傻瓜既dc機仔，到慢慢變為半專業機、以至呢兩年成行成市既數碼單鏡機，個個都係全副裝備咁去影架。所以去到我會知道今年最hit既係邊隻牌子機。我諗如果c記同n記係度賣影花用既微距鏡，一定發過豬頭，哈哈！

我今年週上個星期日去左，淨係排隊買飛都用左三個字，入到去就更加發覺個場係逼爆！可能個個見該日好天(因之前幾日係咁陰天同落雨)，所以湧哂去睇 / 影花。你想慢慢構圖咩？難矣... 所以，我而家希望出年可以同女友係平日攞到一日假去花展吧...

講左咁耐，係時候獻醜了。


是次花展主題花 - 洋葵.....

無奈.........

睇完鐵鎚兄既呢篇文後，望望同期出黎做野既中學、甚至係大學同學，再望望自己，唉！

人做咁耐野我做咁耐野，捱左四年都仲未做到人地可能第一年已經做到既野，即是：冇資格交稅！

第一份工，以為入到公營機構會係件好事，特別果陣撞正沙士，以為會有安樂茶飯食下。點知，政府話要共渡時艱，齊齊減人工，仲要減足兩年！基於薪酬不能好過政府同級員工的原則下，我呢d小番茄都要減埋一份！諗呢條橋出黎既人大既冇諗過，佢減3%對其生活既影響大概係一萬唔見幾十，但對我呢d蟻民黎講，3%等同幾舊水囉喎。唯見當時環境如斯惡劣，算，我忍！最吹漲係，當出面個市好番既時候，減薪期限仍未完結！眼見同自己一齊畢業既友人，人工經已由低於八千步向一萬大關之時，小弟仍然繼續被削！於是同我同grade既走下一個，走下又一個，但該機構仍堅持同等原則(今次攞政府同級最低point黎比)，亦即是：人工冇得加！忍無可忍兼出面剛好有機會時，我走了。

第二份工，情況好好多，除左無哂醫療福利外，其餘一切均比之前好。人工叫做加左，之但係個數，竟然同我兩年前剛入職第一份工時既人工相差不足五百大元！阿q d諗，其實個加幅已經叫做超過通帳，但比起其他人黎講，我都仲係偏低.....

而家呢份工，正如之前所講算係還自己一個心願，叫做「學以致用」。當初係因為畢業時it界極不景氣，同屆出黎既除左一個而家搭巴士時會見到佢同個女仔講電腦外，真係入番it既不足廿人，其他唔係走去繼續進修、投身教育界就係走去賣香燻，結果自己都轉埋行。舊年見現時公司請it位，諗住趁自己仲未有咩負擔時還下心願，膽粗粗走去應徵，又得左喎！結果，it生涯就此開始。睇返轉頭，入離一年，雖然過probate後同新年前分別加過人工，唯同有資格交稅仍差一大步！連一個岩岩入黎既同事(唔同部門，做左一年野，職責係做filing)都高人工過我！

你話，我有乜可能會唔感到無奈兼心淡呢............

新年過後

話咁快，農曆新年黃金週咁就過完，週一開始又會同之前一樣，個個趕返工..

一如以往，今年又係初四開市，係呢三日半既工作，坦白講，真係冇乜mood去做野...

唯一有所得著係，今年係呢間公司逗左唔少利是，個收穫應該都幾....哈哈哈！XD

唔經唔覺咁就係呢間公司做左一年，呢一年黎所做過既野，老實講，鐘意做又談唔上，你話完全唔鐘意咩，又唔係啵。某程度上算係還自己一個心願，叫做「學以致用」(雖則學完都已經掉低左幾年，用得著既百份比就真係值得商確)。當初做呢份工既目標已經達到，我諗，而家係時候為將來打算喇.....